Week 5, dag 5: Die voleinding van alles

Tema: Lewe wat waarlik lewe is

Week: Die ewige lewe

 

“Geseënd is dié wat hulle klere was sodat hulle reg kan hê op die boom van die lewe en deur die poorte in die stad kan ingaan”

(Openbaring 22:14)

 

Doelwitte:

Verstaan die volle sirkel van God se ewige plan

Motivering om te volhard

Blydskap in die Here Jesus Christus

 

Toe ‘n vriendin my vroeër vanjaar gevra het om vir haar en haar expat vriendinne ‘n Afrikaanse Bybelstudie te skryf, het ek geen idee gehad van die geestelike reis waarop dit my sou neem nie. Die saadjie vir ons tema het Hy reeds ‘n klein rukkie tevore onaangekondig in my hart geplaas: Daardie lewe wat waarlik lewe is. Toe die versoek vir ‘n Bybelstudie kom, het ons studie-inleidingsvers, 1 Timotheus 6:19 skielik in my hart lewendig geword...God het ons tema gekies. En wat ‘n reis. Ek het soveel geleer. Ek voel asof ek weer naby aan die Here gekom het, asof ek weer geestelik asemhaal. Ek voel met die Gees vervul terwyl ek met my geestelike oë gekyk het na die koninkryk wat kom, die koninkryk van die lewe, die koninkryk van God. Vandag liewe vriend en vriendin, sluit ons ons studie af maar ek weet dat daar nog soveel te leer is, soveel om te ontdek. Mag God aanhou om sy waarheid oor die ware lewe aan ons te openbaar! Kom ons geniet egter nou saam ons laaste hemelse blik op die ware lewe J

 

Lees Genesis 3:22-24 en beantwoord die volgende vrae:

Wat wou God nie hê moet gebeur nie?

Hoekom dink jy wou God nie dat dit gebeur nie? Was dit nie sy begeerte dat die mens vir ewig in sy liefde en lewe sou deel as sy kinders nie?

Om jou te help, antwoord die volgende vrae:

Van watter boom het die mens reeds geëet?

In watter toestand het dit die mens gelaat?

As die mens ook nou van die boom van lewe sou eet, in watter toestand sou die mens vir ewig bly voortleef?

As die mens vir ewig sou voortleef, sou hy dit nodig geag het om van sy sondige natuur verlos te word?

Wat het God met die mens gedoen volgens vers 24?

Wat het God oos van die tuin van Eden geplaas?

Hoekom het Hy dit gedoen?

Die mens was afgesny van die lewe wat daar in God is, maar gelukkig was die mens nie afgesny van die liefde van God nie! God se liefde was en is groter!

Voltooi Johannes 3:16 hieronder:

“God het die wêreld so ________ gehad dat Hy sy enigste Seun __________ het, sodat dié wat in Hom ________, nie ___________ sal gaan nie maar die  __________ _________ sal hê.”

Gedurende die afgelope vyf weke het ons gesien hoe ons, in Christus en deur die Heilige Gees deur die geloof weer deel kan kry aan die ewige lewe, die ware lewe. Ons het gesien hoe ons, steeds in hierdie gebroke lewe, reeds iets van die ware lewe kan lééf. Maar, vriend en vriendin, kom ons kyk nou na die voleinding van dit wat ons glo en hoop.

Lees Openbaring 21:9-27 en beantwoord die vrae:

Wat word die nuwe Jerusalem in vers 9 genoem?

Dink jy die ‘vrou van die Lam’ is ‘n dooie stad of die mense van die stad?

Van waar kom die stad?

Wat het die stad volgens vers 11?

Van vers 11 tot vers 21 kry ons ‘n beskrywing van die nuwe stad Jerusalem se voorkoms. In aggenome dat Jesus vir ons as blote mense ‘n fisiese beskrywing moes gee wat ons kan verstaan, wat dink jy is die simboliek van ‘n stad gebou met die kosbaarste van edelgesteentes ?

Wie is die Tempel van die stad?

Wat noem Jesus homself in Johannes 8:12?

Wie is werklik die lig van die nuwe stad Jerusalem?

Is die poorte van die stad bewaak of gesluit?

Wie sal in die stad kan ingaan?

Hoeveel meer beteken daardie term nie nou vir my nadat ek hierdie studie oor die ware lewe gedoen het nie... ‘die boek van die lewe, die boek van die Lam’!

Lees Openbaring 22:1-6 en beantwoord die vrae:

Wat het Johannes gesien in vers 1?

Waaruit stroom hierdie rivier?

Wat staan tussen die hoofstraat en die rivier?

Word die boom steeds gerubs en ‘n vlammende swaard bewaak?

Hoe vrugbaar is die boom?

Wat doen die blare van die boom?

Ek weet nie van jou nie, maar ek kan huil soos ek hier sit en skryf. Huil van blydskap, dankbaarheid en ‘n besef van God se genade. Die boom van die lewe sal nie vir ewig bewaak word nie.

Waar sal die troon van God en die Lam wees?

Wie sal Hom dien?

Sal ons Hom kan sien?

Wie se Naam sal op ons koppe wees?

Tot wanneer sal dit voortduur?

Hoe betroubaar is hierdie woord?

Voordat ons afsluit hoor ek graag wat jou gevoel is aan die einde van hierdie studie?

Lees Openbaring 22:12-14 hieronder:

“Jesus sê toe weer: ‘Kyk, Ek kom gou! Ek bring die loon saam met My om elkeen te beloon vir wat hy gedoen het. Ek is die Alfa en die Omega, die Eerste en die Laaste, die Begin en die Einde. Geseënd is die wat hulle klere was sodat hulle reg kan hê op die boom van die lewe en deur die poorte in die stad kan ingaan.”

 

Amen

Week 5, dag 4: ‘n Plek sonder trane

Tema: Lewe wat waarlik lewe is

Week: Die ewige lewe

 

“...vreugde in plaas van droefheid, blydskap in plaas van hartseer.”

(Jesaja 61:3)

 

Doelwitte:

Verstaan die negatiewe effek van sonde op ons aardse bestaan

Bepaal hoe Christus ons van sommige van hierdie effekte verlos het reeds tydens ons aardse bestaan

Verstaan die volkome afwesigheid van al hierdie negatiewe effekte in die hemelse koninkryk

Soos wat ek hier sit en skryf woed daar gruwelike oorloë in die Midde-Ooste en die Ukraíne, honderde sterf ‘n aaklige dood aan die Ebola virus in Wes-Afrika, ‘n ma en pa in ons omgewing rou oor die afsterwe van hul 9-jarige dogtertjie en ‘n dierbare vriendin is baie siek in die hospitaal nadat hulle ‘n kol op haar long gevind het slegs weke nadat sy ‘n dubbele vastektomie gehad het en ek sak my eie kop as ek dink aan hoeveel keer en hoe maklik ek hierdie week nog toegegee het aan die begeertes van my sondige natuur.

Sedert Adam en Eva hul rug op God gedraai het in Genesis 3, leef ons in ‘n gebroke wêreld gekenmerk deur lyding, pyn, droefheid en swaarkry. In een woord, die lewe is ‘n stryd. Selfs wanneer ons die ware lewe in Christus ontdek het en dit nou leef, leef ons dit steeds in die konteks van ‘n gebroke wêreld en in stryd met ons sondige natuur. Wie van ons is onaangeraak hierdeur, wie spring dit vry? Daarom is vandag se les vir my ekstra spesiaal, ekstra kosbaar.

Kom ons begin by die begin: Lees Genesis 3 in sy geheel en beantwoord dan die vrae:

Watter negatiewe emosies sien ons vir die eerste keer ooit in vers 7 en 10?

Watter negatiewe aksies sien ons vir die eerste keer in vers 8, 12 en 13?

Watter negatiewe gevolge sien ons in vers 15-19?

Watter verdere negatiewe gevolge word in die volgende twee verse beskryf:

Romeine 6:6: _________________________
Romeine 7:15: ________________________

Uit die vuis uit, watter van bogenoemde negatiewe effekte is in Christus tot niet gemaak?

Watter van bogenoemde negatiewe effekte is steeds deel van selfs Christene se lewe?

Lees Romeine 8:18-23 en beantwoord die volgende vrae:

Wat sê Paulus van ons huidige aardse lyding?

Wie sug almal in die ‘pyne van verwagting’?

Skryf ‘n paar woorde oor jou eie ‘sug’.

Waarvan sal God ons bevry?

Kom ons kyk nou na die dinge wat nie in die hemel sal wees nie. Lees die volgende verse en skryf die dinge neer wat nie die koninkryk van God sal sien nie:

Openbaring 21:27: _________________________

Openbaring 22:3: __________________________

Openbaring 22:5: __________________________

Openbaring 18:21: _________________________________

Waarvan dink jy is Babilon simbolies?

Openbaring 20:7-10: ________________________________

Openbaring 20: 14: _________________________________

Openbaring 21:4: ___________________________________

Wat sal die doderyk moet ‘teruggee’ volgens 1 Tessalonisense 4:16?

Waaroor is jy alles die blyste dat dit sal verbygaan en nie in die hemel sal wees nie?

Lees Hebreërs 11:39-40 hieronder:

“En hoewel daar oor hulle almal vanweë hulle geloof met soveel lof getuig is, het hulle nie verkry wat beloof is nie, omdat God vir ons iets beters beoog het, sodat hulle nie sonder ons die voleinding sou bereik nie.”

Wat is die belofte waarna ons almal uitsien? (kyk na Hebreërs 11:10,13)

Hoekom het hulle nog nie die belofte gekry nie?

Wat sal ons almal, al die gelowiges en opregtes van alle tye, saam bereik?

Ek kan nie wag nie.

Tot more,

Lize

Week 5, dag 3: Uitnemender beloftes

Tema: Lewe wat waarlik lewe is

Week: Die ewige lewe

“Christus het nie ingegaan in ‘n heiligdom wat deur mense gemaak is en net ‘n namaaksel van die ware is nie. Nee, Hy het in die hemel self ingegaan...”

(Hebreërs 9:24)

Doelwitte:

Besef dat die hemel ‘n beter bedeling as die aardse bedeling is

Verstaan van die belangrikste verskille tussen die hemel en die aarde

Ek het hierdie week al so baie geleer oor dié koninkryk in die hemel waarvan ek nou deur Christus, ‘n burger is. Vandag kyk ons nog ‘n bietjie dieper na van die verskille wat daar is tussen die aardse bedeling waar ons ons nou nog bevind en die nuwe hemelse bedeling wat ons verwag.

Lees Eksodus 25:8-9 hieronder en beantwoord die vrae:

“Hulle moet vir My ‘n heiligdom oprig dat Ek tussen hulle kan woon. Die tabernakel en al sy toebehore moet gemaak word presies volgens die plan wat Ek jou gewys het.”

Wat noem die Here die tabernakel in die eerste sin hierbo?

Wat was die doel van die tabernakel?

Wat het die Here vir Moses gewys?

Hoe noukeurig moes Moses die Here se plan navolg?

Wat was die rol van die Hoëpriester volgens Hebreërs 5:1?

Lees nou die volgende Skrifgedeeltes en beantwoord die vrae:

“Christus het nie ingegaan in ‘n heiligdom wat deur mense gemaak is en net ‘n namaaksel van die ware is nie. Nee, Hy het in die hemel self ingegaan om nou ter wille van ons voor God te verskyn.” (Hebreërs 9:24)

“Hulle bedien egter slegs ‘n afbeelding en skadubeeld van die hemelse heiligdom...nou het Jesus ‘n voortrefliker priesterdiens gekry deurdat Hy Middelaar is van ‘n beter verbond wat op uitnemender beloftes gegrond is.” (Hebreërs 8:5-6)

“...ons het ‘n Hoëpriester, Een wat gaan sit het aan die regterkant van die troon van die Majesteit in die hemel. Hy is bedienaar van die heiligdom, die ware verbondstent, wat deur die Here opgerig is en nie deur ‘n mens nie.” (Hebreërs 8:1-2)

Waar is die ware heiligdom?

Wie het almal toegang tot die ware heiligdom?

Wie het hierdie toegang bemiddel?

Wat dink jy is die hoofdoel van die ware heiligdom?

Watter belofte kry ons in Openbaring 21:3?

Hoe is hierdie belofte uitnemender as selfs ons huidige verhouding met die Here?

Voltooi Openbaring 21:22 hieronder:

“’n ____________ het ek nie in die stad gesien nie, want sy ___________ is die  _______ _________, die Almagtige, en die _________.”

Wat sal volgens die volgende verse word van die huidige bedeling, die skadubeeld:

Hebreërs 8:13:____________________________________

Jesaja 65:17: _____________________________________

Wat is egter die uitnemende belofte in Jesaja 66:22?

Dit bring ons by jou en by my en die gelowiges in Christus. Ook vir ons is daar ‘n bestaan wat ons aardse bestaan ‘n blote skadubeeld maak.

Watter beloftes is daar vir my en vir jou in die volgende verse:

Filippense 1:6: __________________________________

Filippense 1:10: _________________________________

Filippense 1: 11: _________________________________

1 Korintiërs 15:42-44: _____________________________

1 Korintiërs 15:52-53: _____________________________

1 Joh 3:2: ______________________________________

Watter van hierdie uitnemender beloftes wat vir ons wag raak jou hart vandag die meeste en hoekom?

Ek is so baie bly oor al die uitnemender beloftes van die nuwe verbond in Jesus Christus. Ek is so baie bly oor die Here se belofte in Openbaring 21:5 – “Toe sê Hy wat op die troon sit: ‘Kyk, Ek maak alles nuut.’”

Groete tot more,

Lize

Week 5, dag 2: Skatte in die hemel

Tema: Lewe wat waarlik lewe is

Week: Die ewige lewe

“Waar jou skat is, daar sal jou hart ook wees.”

(Mattheus 6:21)

Doelwitte:

Verstaan die konsep van hemelse skatte

Besef die belang en die ewigheidswaarde van die liefde

Besef dat die Here self ons grootste skat is

Vandag begin ons sommer dadelik met die voet in die huis...of dalk moet ek sê

 ‘n voet in die skatkamer van die hemel J.

Lees 1 Petrus 1:3-7a en beantwoord die vrae:

Wie is ons lewende hoop?

Kan jy in jou eie woorde verduidelik hoekom Hy ons hoop is?

Wat word vir ons in die hemel in bewaring gehou?

Kom ons doen ‘n omgekeerde oefening. Teenoor elke beskrywing van ons hemelse erfenis hieronder wil ek hê dat ons drie dinge in ons lewe sal neerskryf wat nie aan die beskrywing voldoen nie maar eerder die teenoorgestelde. Met ander woorde drie dinge wat wel verganklik, besmet en verwelkbaar is:

Onverganklik - ______________________________________________________

Onbesmet - _________________________________________________________

Onverwelklik - ______________________________________________________

Wat hier op aarde is nié verganklik, besmet en verwelkbaar nie? Wat ‘n troos om te weet dat dit wat vir ons in die hemel wag onverganklik, onbesmet en onverwelklik is!!

Wat bid Paulus vir die Efesiërs rakende die heiliges se erfenis in Efesiërs 1:17-18?

In ons hemelse erfenis is daar ‘n heerlike rykdom wat ons slegs deur geopende geestesoë kan begin verstaan! Ongelukkig beskou ons alles nog so maklik deur wêreldse oë. Ons idee van ‘n erfenis en rykdom is dikwels nog so aardsgebonde.

Lees Openbaring 3:17-18 en beantwoord die vrae:

Wat het die Laodisiërs gedink?

Wat het Jesus gesê moet hulle by Hom koop?

Lees 1 Petrus 1:7 om te sien wat Jesus moontlik met gesuiwerde goud kon bedoel.

Lees Openbaring 19:8 om te sien waarna die wit klere moontlik kon verwys.

Lees 1 Timotheus 6:17-19 en beantwoord die vrae:

Aan wie is hierdie raad gerig?

Waarop moet hulle nie hulle hoop vestig nie?

Waarin moet hulle eerder ryk wees?

Wat vergader hulle daardeur vir hulleself?

Wat sal hulle beloning wees?

Hoe stem dit ooreen met wat Jesus in Lukas 12:33-34 sê?

As ons mooi kyk na die boonste gedeeltes uit 1 Timotheus 6 en Lukas 12 dan sien ons dat die rykdom wat ewigheidswaarde het te doen het met mense, diensbaarheid en liefde.

Voltooi 1 Korintiërs 13:8 hieronder:

“Die ________ vergaan _________ ______...”

Ek weet nie van jou nie, maar dit maak my opgewonde om te besef dat daar wel iets hier op aarde is wat ewigheidswaarde het. Reeds hier op aarde kan ons ‘n hemelse skat ontdek en uitleef.

Wat sê Romeine 5:5 van die liefde?

God het sy liefde nou reeds in ons harte uitgestort, en deur die uitdeel en uitleef van daardie liefde, gaar ons vir ons ‘n hemelse skat op maar, liewe vriend en vriendin, in die hemel is daar ‘n ongelooflike rentekoers...in die hemel sal ons soveel meer kry as bloot die liefde wat ons hier geleef het...in die hemel is God die Vader wat liefde is en Jesus Christus, die bewys van sy liefde vir ons!

Kom ons sluit af met Psalm 16:5 hieronder:

“Here, my erfdeel, my beker, U bepaal my lot. Die meetsnoere het vir my in lieflike plekke geval, ja, my erfenis is vir my mooi.”

Ons erfdeel, ons skat, ons rykdom is die Here self!

Na aanleiding van ons inleidingsteks...waar is jou skat, waar is jou hart?

Groete tot more

Lize

Week 5, dag 1: Burgers van ‘n nuwe koninkryk

Tema: Lewe wat waarlik lewe is

Week: Die ewige lewe

“Maar ons is burgers van die hemel, van waar af ons ook die Here Jesus Christus as Verlosser verwag.”

(Filippense 3:20)

Doelwitte:

Besef dat ons nou tot ‘n nuwe koninkryk behoort

Identifiseer die kerneienskappe van diegene met hemelse burgerskap

Besef dat ons nou koningskinders is wat heilig leef

Die afgelope vier weke het ons gekyk na die konsep van daardie lewe wat waarlik lewe is. ‘n Ruk gelede het ek ‘n preek van Charles Spurgeon gelees waarin hy dit so mooi opsom: Soos wanneer die liggaam slegs lewendig is wanneer dit met die siel verenig is en sterf wanneer die siel die liggaam verlaat, so op sy beurt word die siel gevul met ware lewe wanneer dit met God versoen is maar sterwe ‘n geestesdood wanneer dit van God afgesny word. Ware lewe, lewe in sy volheid, is daar waar ons met God versoen is. Daarom is die ware lewe wat van God af kom reeds ‘n werklikheid in die lewens van diegene wat in Christus en deur die Gees naby aan God gekom het, al leef ons steeds binne die konteks van ‘n gebroke wêreld.

Maar God se plan vir diegene wat Hom liefhet is veel groter as dit. “Wat die oog nie gesien en die oor nie gehoor het nie, en wat in die hart van ‘n mens nie opgekom het nie, dit het God gereed gemaak vir dié wat Hom liefhet.” (1 Korintiërs 2:9)

Hierdie week kyk ons na die lewe wat kom, die tyd wanneer die ware lewe tot volle vervulling sal kom. Ons lesse gaan effens korter wees. Dit sal wees soos lekseltjies van ‘n heerlike roomys op ‘n snikhete somersdag! Kom ons begin.

Lees Johannes 18:36 en beantwoord die vrae:

Wat bedoel Jesus as Hy sê dat sy koninkryk nie van hierdie wêreld is nie?

Waar is sy koninkryk?

Watter verskil sê Hy sou dit aan sy dienaars gemaak het as sy koninkryk wel van hierdie wêreld was?

Watter tipe oorlog voer ons wel volgens Efesiërs 6:12?

Dink jy Pilatus kon verstaan dat ‘n koning se dienaars nie die swaard sou opneem nie?

Wie is Jesus se dienaars? Is jy ‘n dienaar van Jesus?

Waarvoor veg jy, aardse oorwinnings of hemelse oorwinnings?

Wat sê Jesus van sy dienaars in Johannes 17:16?

Kyk weer na vandag se inleidingsteks. Waartoe behoort ons nou?

Lees Mattheus 13:44-50. Skryf alles neer wat jy uit hierdie gedeelte geleer het van dié koninkryk waartoe jy nou behoort.

Hoe kosbaar is jou hemelse burgerskap vir jou?

Kan ‘n mens in jou handel en wandel sien dat jou hemelse burgerskap vir jou baie kosbaar is?

Lees Mattheus 5:3-12

Noem soveel eienskappe van hulle wat tot die hemelse koninkryk behoort, as wat jy in hierdie gedeelte kan kry.

Noem soveel beloftes wat vir diegene in die hemelse koninkryk wag, as wat jy in hierdie gedeelte kan kry.

Hemelse burgerskap is so ongelooflik kosbaar! Dit is die kosbaarste geskenk wat ons ooit kon kry uit die Vaderhand. Dit is duurgekoop en vir dié wat daartoe geroep is moet dit wees soos met die kosbare pêrel in Mattheus 5.

Lees 2 Petrus 1:10-11 en beantwoord die vrae:

Is jy ‘n burger van die hemelse koninkryk? As jy enigsins twyfel, vra God om dit aan jou te openbaar. Vra Hom om vir jou die ewige lewe in Christus Jesus te skenk deur die vergifnis van jou sondes.

Wat sê Petrus moet ons doen indien ons burgers van die hemelse koninkryk is?

Kan mense in jou daaglikse lewe sien dat jy nie tot hierdie wêreld behoort nie?

Voltooi vers 11 hieronder:

“En dan sal daar vir julle __________ en ____________ toegang wees tot die _________ ___________ van ons Here en Verlosser, Jesus Christus.

Wat sê Petrus van ons in 1 Petrus 1:9?

Wat wag vir ons in die hemel volgens elk van die volgende verse:

1 Korintiërs 9:25: __________________________

2 Timotheus 4:8: ___________________________

Jakobus 1:12: ______________________________

1 Petrus 5:4: _______________________________

Openbaring 2:10: ___________________________

Lees nou Openbaring 3:11-12.

Watter opdrag gee Jesus hier vir ons?

Skryf alles neer wat ons volgens hierdie gedeelte in die hemel kan verwag as ons aan Hom en sy waarheid vashou.

Genoeg roomys vir een dag! More kyk ons verder.

Groete,

Lize

Week 4, dag 5: ‘n Voorbeeld in Stefanus

Tema: Lewe wat waarlik lewe is

Week 4: Lewe deur die Heilige Gees 

“Kyk,” het hy gesê, “ek sien die hemel geopen en die Seun van die mens wat aan die regterhand van God staan.”

(Handelinge 7:56) 

Doelwitte:

Besef dat die Gees ons geestesoë open

Besef dat die Gees die hemelse koninkryk naby bring 

Vandag kyk ons na ons laaste voorbeeld van lewe deur die Gees. Ons fokus is Stefanus, die eerste martelaar vir Christus. 

Lees Handelinge 7:8-15 en beantwoord die vrae: 

Wat het God vir Stefanus gegee en wat het Stefanus gedoen? 

Hoekom kon die lede van die Sinagoge nie met Stefanus redeneer nie? 

Met watter wysheid het Stefanus gepraat? 

Wat het die lede van die Raad opgemerk toe hulle stip na Stefanus gekyk het? 

Hoekom dink jy het sy gesig so gelyk? 

Aan watter Ou Testamentiese karakter laat dit jou dink? 

Lees Eksodus 34:28-35. Wanneer het Moses gesig geblink? 

Intimiteit met die Here wys! Wanneer Moses by die Here was het sy gesig geblink. Stefanus was deur die Gees naby aan die Here en sy gesig het soos die van ‘n engel gelyk. Dit wys ook op ons gesigte as ons deur die Gees tyd met die Here spandeer! 

Kyk vlugtig na Stefanus se toespraak in Handelinge 7. Dit herinner my nogal aan Petrus se indrukwekkende toespraak met die uitstorting van die Heilige Gees. Dit is belangrik dat ons sal onthou dat Petrus en Stefanus gewone mense soos ons was. Hulle het nie in hul eie kennis, insig en krag opgetree nie maar deur die Gees...dieselfde Gees wat ook nou in jou en in my woon en werk. 

Waarvan beskuldig Stefanus die Raadslede in vers 51? 

Wat was die Raadslede se reaksie op hierdie beskuldiging? (vers 54) 

Hoe word Stefanus in vers 55 beskryf? 

Wat het hy gesien? 

Watter dinge het Jesus volgens Johannes 16:13 gesê sal die Heilige Gees aan ons verkondig? 

Ek kan nie help om ‘n hartseer glimlag te onderdruk as ek aan die Raadslede se reaksie op Stefanus se visioen dink nie. Hulle het geskree en hulle ore toegedruk.  

Ken jy mense wat so reageer op God se waarheid? Hoe beinvloed dit jou vrymoedigheid as jy weet dat mense so sal reageer op jou getuienis? 

Hoekom dink jy het dit geen effek op Stefanus gehad nie? 

Wat het hulle met Stefanus gedoen? 

Met watter woorde het Stefanus gesterwe? 

Dink jy hy het dit waarlik bedoel of dink jy hy het bloot Jesus se woorde aan die kruis nagemaak? 

Hoe dink jy is dit moontlik dat Stefanus vir dié mense wat hy sopas berispe het, wat Christus verwerp het en nou ook besig was om homself dood te maak, kon pleit dat die Here hulle nie hierdie sonde sou toereken nie?

Hoekom dink jy wou Stefanus graag hê dat hulle vrygespreek word? 

Wanneer ons die ware lewe ‘sien’ en dit ontvang in ons denke, ons harte en ons siele verander alles. Ons word los van alles wat aan hierdie aardse bedeling behoort. Wat groot ‘issues’ was word klein. Wat belangrik was word onbelangrik. Die begeertes van ons vlees en sondige natuur wat ons eens ten alle koste moes bevredig, verdwyn soos mis voor die son want al wat nou vir ons belangrik is, is dat God se koninkryk sal kom en sy wil geskied soos in die hemel, net so ook op die aarde. Soos in ons lewens, so ook in ander se lewens. Wanneer ons die ware lewe ‘sien’, sien ons ook die ware God en hoe groot sy genade werklik is, ook in ons eie lewe.  

As jy Stefanus se visioen kon ‘sien’, watter effek sou dit op jou hê, wat sou jy nou anders doen? 

Gaan doen dit dan.

Kies die lewe en leef reeds nou al die ware lewe! 

Ek kan nie wag vir volgende week nie...

Groete,

Lize

Week 4, dag 4: Wandel in die Gees

Tema: Lewe wat waarlik lewe is

Week 4: Lewe deur die Heilige Gees

“...omdat God julle as eerste vrug gekies het om verlos te word, deurdat die Gees julle heilig en deurdat julle die waarheid glo.”

(2 Thessalonisense 2:13)

Doelwitte:

Besef dat ons vry is om te kies

Verstaan die effek van die Gees op ons gedrag

Verstaan die nou band tussen ons gedrag en die ewige lewe

Vandag se studieles sluit nou aan by gister se les. Gister het ons gekyk na die effek van die Gees op ons verhoudings en vandag kyk ons na die effek van die Gees op ons gedrag. Ons gedrag bepaal wat in ons verhoudings aangaan! As die Heilige Gees eenheid bewerk, dan bewerk dit ook ‘n nuwe hartsgesindheid en nuwe gedragspatrone in ons lewens. Kyk weer na ons inleidingsvers hierbo. Om geheilig te word beteken om vir God afgesonder te word en om skoongewas te word. Dit dui op ‘n heiligmaking van beide ons harte en ons lewens. Kom ons kyk hoe dit werk:

Lees Galasiërs 5:13-26 en beantwoord die vrae (hou maar ‘n boekmerk by Galasiërs 5 omdat ons vandag gereeld gaan terugkeer na hierdie Skrifgedeelte):

Hoe beskryf Paulus die hele wet van God in vers 14?

Hoe stem dit ooreen met wat ons gister rakende die Heilge Gees se werking geleer het?

Kan die Gees van God ooit teen die wet van God werk?

Watter gedrag bespeur Paulus egter in vers 15?

Wat is die praktyke van die sondige natuur?

Sou jy sê hierdie praktyke bewerk eenheid of verdeeldheid tussen mense?

Is daar enige van hierdie gedrag in jou eie lewe en die mense om jou se lewens sigbaar?

Dit is belangrik om te verstaan dat ek en jy in Christus nuwe mense is. Waar ons voorheen vyandiggesind was teenoor God en sy gebooie, het ons Hom nou lief en strewe daarna om volgens sy wil te leef. Ons gees wat dood was en afgesny van God as gevolg van die sonde, is nou deur die Heilige Gees nuutgebore. Tog het die sonde nie verdwyn nie. Ons sondige natuur leef voort in ons vlees. Daarom is daar nou ‘n stryd tussen ons vlees en ons gees.

Lees 1 Petrus 2:11 hieronder en beantwoord die vrae:

“Geliefdes, ek dring daarop aan dat julle...julle weerhou van liggaamlike begeertes wat stryd voer teen die siel.”

Praat Petrus hier met sondaars of gelowiges?

Waarvan moet hulle hulle weerhou?

Wat doen hul liggaamlike begeertes?

Lees nou Romeine 8:16 hieronder en beantwoord die vrae:

“Hierdie Gees getuig saam met ons gees dat ons kinders van God is.”

Met watter Gees is ons wedergebore gees nou in ‘n verbondenheid?

Kyk terug na Galasiërs 5. Wat sê vers 17 van die verhouding tussen die sondige natuur en die Gees van God?

Waar laat hierdie situasie ons? Ons bevind ons nou in ‘n posisie waar ons God liefhet en Hom wil behaag, terwyl ons sondige natuur steeds daar is en ‘n styd voer teen ons nuwe lewe en nuwe begeertes! Wat kan en moet ons doen?

Kyk weer na Galasiërs 5:13. Waartoe is ons geroep?

Dink terug na ons eerste week van studie oor die ware lewe. Vryheid impliseer keuse en keuse verg die aksie om te kies. Adam en Eva het teen God gekies en daardeur slawe van die sonde geword. Dit beteken hulle kon daarna nie teen sonde kies nie, hulle kon nie vry van sonde wees nie. Jesus het daarom in die vlees die sonde kom oorwin en deur sy bloed ons vrygekoop en vrygemaak. Hy het my en jou kom plaas in die posisie waar ons weer kan kies. Ons kan kies om ons steeds te laat lei deur ons sondige natuur of ons kan kies om ons te laat lei deur die Gees van God wat Hy ons geskenk het toe ons Jesus as ons Verlosser aanvaar het.

Watter waarborg kry ons in Galasiërs 5:16?

Wat doen die Gees volgens Titus 2:11-13?

Kyk weer terug na Galasiërs 5:24. Wat moet die gelowige doen?

Hoe stem dit ooreen met wat Jesus gesê het in Mattheus 16:24-25?

As ons ons sondige natuur gekruisig het, dan word ons lewe deur die Gees beheers. Wat sê Galasiërs 5:25 moet ons doen?

Wanneer ek in ‘n situasie is, reageer my vlees. Miskien voel ek bang. Miskien is ek seergemaak en kwaad vir iemand. Miskien wil ek iets ongeoorloof doen. Die reaksie en die begeerte van die vlees is daar. Tog, omdat ek God se Gees in my het, weet ek wat reg en verkeerd is. Ek weet wat ek moet en nie moet doen nie. Sover het ek nog nie iets verkeerd gedoen nie, ek ervaar net sekere emosies of begeertes. Nou kan ek kies wat of Wie my gedrag gaan bepaal. My sondige natuur of die Gees van God. As ek my sondige natuur gaan toelaat om my gedrag te bepaal gaan dit uitloop op sonde. Ek gaan vreesagtig wees, of ek gaan vergelding soek of daardie ongeoorloofde ding doen. Maar as ek ‘nee’ sê vir my sondige natuur, gaan ek deur die Gees se krag, God se wil doen en dit sal vrug dra in my lewe.

Tot watter mate laat jy toe dat die Gees ook jou gedrag bepaal?

Voltooi Romeine 8:13 hieronder:

“As julle julle lewe deur die sondige natuur laat beheers, gaan julle die _______ tegemoet, maar as julle deur die Gees ‘n ________ ________ maak aan julle sondige praktyke, sal julle ________.”

Watter waarskuwing kry ons in Galasiërs 5:21?

Wat is die vrug van die Gees volgens Galasiërs 5:22?

Dit my liewe vriende, is die eienskappe van iemand wat reeds hier op aarde die ware lewe ontdek het en dit deur die Gees leef! Kom ons span alles in om voluit deur die Gees te leef.

Tot more,

Lize

Week 4, dag 3: ‘n Voorbeeld in die gelowiges

Tema: Lewe wat waarlik lewe is
Week 4: Lewe deur die Heilige Gees

“Hy is immers die hoof, en uit Hom groei die hele liggaam.”

(Efesiërs 4:15b-16a) 

Doelwitte:

Verstaan gelowiges se eenheid deur die Gees

Begryp die belang en volle betekenis van gelowiges se eenheid

Verstaan die gelowiges se toerusting deur die Gees 

Ons het die afgelope twee dae gekyk na die werking van die Heilige Gees in Jesus tydens sy aardse lewe en ook in die dissipels en apostels. Die gevolg van Jesus se lewe asook die dissipels en apostels se lewens was...gelowiges! Elke dag het meer en meer mense hulle harte vir God gegee deur hul geloof in Jesus Christus as Verlosser. Dit was en is God se begeerte en wil – om mense met Homself te versoen. Vir God gaan dit om mense. 

Wat het God belowe volgens Handelinge 2:17-18? 

Is jy ingesluit by hierdie belofte? 

Lees Efesiërs 4:3-4 en vers 15-16 en beantwoord die vrae: 

Wat doen die Gees tussen gelowiges? 

Wie is die liggaam van Christus? 

Hoeveel liggame is daar? 

Wie is in die een liggaam? 

Hoe werk en woon die een God in almal? 

Uit wie groei die hele liggaam? 

Wat leer vers 16 ons van die afsonderlike lede van die liggaam? 

Lees nou 1 Korintiërs 12:12-13 en die ontbrekende woorde in: 

“Omdat ons ________ een liggaam geword het, is ons almal met die _______ _________ gedoop, of ons nou Jood of Griek is, slaaf of vry. Ons is ____________ van die een Gees ________.” 

As jy terugdink aan alles wat ons sover oor die Gees geleer het, wat beteken dit vir jou om te weet dat jy van die Gees deurdrenk is? 

Lees 1 Korintiërs 12:4-11 en beantwoord die vrae: 

Wat gee die Gees vir elke Christen? 

Klik op die volgende skakel om die sien wat bedoel word met ‘n ‘genadegawe’: 

http://www.blueletterbible.org/lang/Lexicon/Lexicon.cfm?strongs=G5486&t=KJV 

Wat word hierdie genadegawes in vers 7 genoem? 

Wat is die doel van hierdie gawes volgens Efesiërs 4:12? 

Uit beide Efesiërs en Korintiërs is dit baie duidelik dat ons deur die Gees een liggaam is en dat hierdie geestelike liggaam ook op ‘n fisiese vlak moet funksioneer. Ek kan my nie van ander gelowiges afsonder terwyl ek myself as ‘deel’ van die liggaam beskou nie. Ek het gawes ontvang wat tot voordeel van die hele liggaam is en so is daar gawes in die liggaam wat tot my voordeel is. Ek moet dus fisies ook deel van die liggaam van gelowiges wees.  

Op watter wyse is jy fisies deel van die liggaam van Christus? 

Volgens Efesiërs 4:13-15, wat is die gevolge wanneer ons as ‘n eenheid funksioneer? 

Mmmm, ek is seker elkeen wat hier lees dink nou aan al die onenigheid tussen die gelowiges. Meer nog, ek is seker elkeen dink nou aan daardie Christene wat so irriterend is, wat die lewe so ‘n taai toffie kan maak! Ek is seker ons kan ons nie indink hoe eenheid met daardie Christene ons meer standvastig sal maak en teen dwaallere beskerm nie! 

Wat is jou gedagtes hieroor? 

Kom ons rig ons gedagtes na wat bo is, na die groter konsep van daardie lewe wat waarlik lewe is en waarna ons strewe. 

Lees Johannes 17:20-23 en beantwoord die vrae: 

Wanneer Jesus hier bid dat ons as gelowiges een mag wees, gebruik Hy ‘n voorbeeld: “...net soos...” Na watter eenheid verwys Hy? 

Wat kan jy uit ons eerste week van studie onthou rakende die eienskappe van hierdie eenheid? 

In vers 22-23 bid Jesus weer dat ons een mag wees en gebruik weer ‘n ‘soos’ vegelyking. Hoe verskil dit van die vorige een waarna ons hierbo gekyk het? 

Wil jy graag deel in die liefde en lewe wat daar in die drie-enige Godheid bestaan? 

Dink jy dit is God se plan vir ons om as individue daarin te deel of as een liggaam van gelowiges? 

Kom ons kyk terug na Efesiërs 1:10-11 hieronder: 

“Sy bedoeling was om alles wat in die hemel en alles wat op die aarde is, onder een hoof te verenig, naamlik onder Christus. Deur Christus het ons deel geword van die volk van God soos Hy dit vooruit al bestem het.”

Wat is God se vooruitbestemde doel? 

Waarvan is jy nou deel? 

My liewe vriend of vriendin, as ek en jy aan die ware lewe wil deel hê, moet ons deel hê aan God se volk, aan Christus se liggaam. Ek en jy kan nie op ons eie volgens God se wil funksioneer nie. Ons kan slegs as een liggaam funksioneer. Dit is God se doel.  

Kom ons sluit vandag vroeg af met 1 Johannes 4:11-12: 

Niemand het God nog ooit gesien nie, maar as ons mekaar liefhet, bly God in ons en het sy liefde in ons sy doel volkome bereik.” 

Watter wrok, watter kwaad, watter irritasie weeg op teen die wonder van God in my.

Watter doel bereik ek deur onenigheid, wat groter is as om God se doel in my volkome te bereik? Wat is die maklikste, om God se Gees te weerstaan en die ware lewe en gemeenskap met die ware God prys te gee, of om die Gees toe te laat om in my te werk en om te vergewe en in vrede en eenheid te leef tot eer van God die Vader?  

In die lig van God se groter doel waarvan ek wil deel wees, is dit belangriker vir my om God se Gees toe te laat om eenheid tussen my en ander gelowiges te bewerkstellig eerder as om hardnekkig aan my eie regte en voorregte vas te klou ten koste van eenheid. 

Liefdegroete,

Lize