“Aan Hom wat die mag het om julle daarvan te
bewaar dat julle struikel, en om julle onberispelik en jubelend voor sy
heerlikheid te stel, aan ons enigste God en Verlosser deur Jesus Christus ons
Here, behoort die heerlikheid, majesteit, krag en mag – van voor alle tye en
ook nou en tot in alle ewigheid. Amen.”
(Judas:24-25)
Doelwitte:
1) Besef dat God in ons huidige lewensbehoeftes voorsien
2) Besef dat God reeds voor die Skepping ons geestelike lewe in Christus verseker het
3) Besef dat die ewige lewe vir ewig vas en veilig staan
Judas 24-25 is
sekerlik van my gunsteling verse in die Bybel. Dit beskryf so mooi dit wat ons
sover in ons studie bestudeer het – ons God en ons Here wat van voor alle tye,
nou en ook tot in alle ewigheid bestaan. Meer nog, dit gee my altyd ‘n gevoel
van sekuriteit. My Here is daartoe instaat en het die mag om my onberispelik en
jubelend in sy hemelse koninkryk in te bring. Is dit nie die versekering wat
ons almal graag wil hê nie?
Verseker!
Weliswaar gaan
ons vandag kyk na die lewensekuriteit wat God vir ons daarstel reeds van voor
alle tye, nou en tot in alle ewigheid.
Sekuriteit vir die ‘nou’
Lees weer Genesis
1-2. Ek weet dis baie, maar dit sal vir jou tot seën wees.
Beantwoord nou
die volgende vrae:
Maak ‘n lys van
enige fisiese behoeftes van die mens wat jy in hierdie 2 hoofstukke kan identifiseer
en dui aan hoe God daarin voorsien het.
Maak ‘n lys van
enige emosionele behoeftes van die mens wat jy in hierdie 2 hoofstukke kan
identifiseer en dui aan hoe God daarin voorsien het.
Na die sondeval
en die sondvloed het die mens se behoeftes verander. Lees Genesis 2:21 en Genesis
9:2-3 en dui aan hoe die Here in hul nuwe behoeftes voorsien het.
Watter belofte
kry ons in Filippense 4:19?
Net nog een teks
om na te slaan – Watter versekering gee Jesus ons in Mattheus 6:31-32?
Dink ‘n bietjie
na oor jou eie lewensbehoeftes. Was God sover getrou om ryklik in jou behoeftes
te voorsien?
Kan jy aan
gevalle dink waar dit tot jou beswil was dat God se antwoord op ‘n gebed ‘nee’
was?
Vertrou jy die
Here volkome om ryklik in jou behoeftes te voorsien of verwag jy eerder ‘n
negatiewe reaksie? Hoekom?
Watter behoeftes
is daar huidiglik in jou lewe wat jou bekommernis besorg?
Skryf ‘n kort
gebed waarin jy God dank dat Hy reeds daarvan bewus is en vir Sy belofte om
ryklik in jou behoeftes te voorsien.
Om in ons fisiese
en emosionele behoeftes te voorsien is belangrik vir ons lewensekuriteit maar
wat van ons lewe self? Iemand se lewe is so min werd vandag en daar is so baie
gevare wat ons lewe bedreig. Inderdaad belowe die Here nie dat ons vir ewig in
ons aardse liggame sal leef nie. Hy belowe ook nie dat ons almal op ‘n
vreedsame wyse in ons slaap die grens tussen hierdie lewe en die ewige lewe sal
oorsteek nie. Tog beteken dit nie dat ons nou in vrees moet leef nie. Ons
aardse lewe beten wel baie vir die Here en Hy het ‘n plan hier en nou vir
elkeen van ons.
Lees die volgende
Skrifgedeeltes noukeurig:
“Wanneer julle
eie bloed vergiet word, sal Ek daaroor rekensap eis, want dit is julle lewe...”
(Genesis 9:5)
“Word vyf mossies
nie vir twee assaria verkoop nie? En nie een van hulle is vergete voor God nie.
Selfs die hare op julle kop is almal getel. Moenie bang wees nie: julle is meer
werd as baie mossies.”
(Lukas 12:7)
“...al my
lewensdae was in u boek opgeskrywe nog voordat ek gebore is.”
(Psalm 139:16)
“Ek is immers
daarvan oortuig dat geen dood of lewe...of teenswoordige of toekomstige
gebeure...of hoogte of diepte...ons kan skei van God se liefde wat daar in
Christus Jesus ons Here is nie.”
(Romeine 8:38-39)
Voltooi die
volgende drie verse uit Psalm 23:
(v1) Die Here is
my herder, ek kom...
(v4) Selfs al
gaan ek deur donker dieptes, sal ek nie bang wees nie, want...
(v6) U goedheid
en liefde sal...
Beantwoord nou die volgende vrae:
Dink jy God weet
van elke bedreiging van jou lewe?
Kan enige iets
met jou gebeur sonder dat God daarvan weet?
Watter van die
bogenoemde verse of enige ander vers in die Bybel bied vir jou die grootste gemoedsrus en sekuriteit? Hoekom?
Nie net kan ons
sekuriteit in God se liefde vind vir ons lewe op aarde nie, maar God het ook
vir ons veilige grense gestel waarbinne ons die volheid van lewe in Hom kan
geniet.
Watter riglyn en
duidelike veiligheidsgrens gee God vir Adam en Eva in Genesis 2:16-17?
Kon hulle die
gevaar vermy het? Hoe?
Lees Johannes
15:9-11.
Watter riglyn gee
Jesus vir ons in hierdie verse?
Hoekom gee Hy vir
ons hierdie riglyne (vers 11)?
As God se riglyne
volkome blydskap tot gevolg het, wat dink jy lê buite God se riglyne?
Sekuriteit van voor alle tye af
In terme van ons
aardse lewe het ons baie sekuriteit nodig maar dit is ook waar vir ons
geestelike lewe! Soos wat ons gister gesien het was dit God se doel om die mens
te skape sodat ons in ‘n liefdevolle verhouding met Hom kan leef tot sy eer. God
wil ons by sy ewige liefde en lewe insluit. Sonde het egter ‘n skeiding
veroorsaak tussen God en die mens. Satan het gehoop dat deur die sonde, die
mens vir altyd uitgesluit sou bly van die ewige lewe van God.
Lees die
Skrifgedeeltes hieronder en beantwoord dan die vrae wat daarop volg:
“Want so lief het
God die wêreld
gehad dat Hy sy enigste Seun gegee het, sodat elkeen wat in Hom glo, nie
verlore gaan nie, maar die ewige lewe kan hê.”
(Johannes 3:16)
“U is waardig om
die boekrol te neem...omdat U geslag is en met u bloed mense vir God gekoop het
uit elke geslag en taal en volk en nasie.”
(Openbaring 5:9)
“...deur middel
van die krag van God, wat ons verlos en geroep het met ‘n heilige roeping
– nie op grond van ons dade nie, maar op grond van sy eie besluit en
genade, wat reeds van ewigheid af in Christus Jesus aan ons geskenk en nou
geopenbaar is deur die verskyning van ons Verlosser, Christus Jesus, wat die
dood vernietig het, maar wat ook deur die evangelie die lewe en die
onverganklikheid aan die lig gebring het”
(2 Timotheus
1:8-10)
Hoe het God die
skeiding wat deur ons sonde veroosaak is, uitgewis?
Wie is die Lam en
wat het Hy gedoen?
Wanneer het God in
sy groot genade reeds besluit om op hierdie wyse vir ons verlossing te bewerk?
Wat het Jesus
Christus nou aan die lig gebring?
Waarin of in wie
is ons totale sekuriteit om die ewige lewe te verkry?
Wie kan almal die
ewige lewe beërwe?
Watter verdere sekuriteit
of sekerheid bied Judas 24-25 ons?
Volgens 2 Korintiërs 1:21, watter waarborg of sekuriteit het
God vir ons gegee van ons insluiting in die ewige lewe?
Sekuriteit tot in alle ewigheid
Laastens kan ons
seker vra? Watter sekuriteit is daar vir ons in die ewige lewe? As ‘n antwoord
op hierdie vraag sluit ek vandag weer eens af met ‘n paar verse uit Openbaring:
“Toe het die
engel aan my ‘n rivier met die water van die lewe gewys. Dit was helder soos
kristal en het gestroom uit die troon van God en die Lam.”
(Openbaring 22:1)
“Daar sal geen
vloek meer wees nie. Die troon van God en die Lam sal in die stad wees en sy diensknegte
sal hom dien. Hulle sal sy aangesig sien, en sy Naam is op hulle voorkoppe.
Daar sal ook nie meer nag wees nie. Die behoefte aan die lig van ‘n lamp en die
lig van die son sal nie meer bestaan nie, omdat die Here God hulle sal verlig
en hulle vir ewig en ewig as konings sal heers.”
(Openbaring
22:3-5)
“Toe het die
engel aan my gesê:
‘Hierdie woorde is betroubaar en waar.”
(Openbaring 22:6)
As ons vanaand
gaan slaap kan ons dit doen met die seker wete dat ons lewe van ewigheid af, nou en tot in alle ewigheid in
Christus Jesus in veilige hande is!
Groete tot more
Lize
Watter verse bied vir my groot sekuriteit? Genesis 9:5 doen nogal iets vir my. Seker omdat ons in so gewelddadige land bly waar lewens so maklik geneem word. Maar God sal rekenskap eis. Ons lewe is vir Hom kosbaar. Nou die dag by ons Wimpy vlieg 'n mossie in en kom sit op die rand van my bord en eet van my kos. Dit het my herinner aan Jesus se versekering dat ons vir Hom baie meer werd is as baie mossies al weet Hy selfs wat met elke mossie gebeur. Laastens natuurlik Jesaja 41:10 is die een vers waaraan ek van kindsbeen af ashou. Die mooiste belofte: Ek is by jou...Ek is jou God, Ek help jou, Ek versterk jou, Ek hou jou vas....Ahhhh!
AntwoordVee uitEk dink die hele gedagte dat God nie maar net vir ons lewe geskenk het, hetsy op aarde of die ewige lewe sonder die nodige sekuriteit en sekerheid nie! Nog voordat Hy ons geskape het, het Hy ons lewens verseker deur die bloed van sy eie Seun...hoeveel te meer sal Hy nie elke dag vir ons sorg nie??? God is in soveel detail betrokke by ons lewens....dit maak werklik vir Hom saak...dit is my grootste troos!!!!
AntwoordVee uit